पुणे : आमदार प्रा. मेधा कुलकर्णी यांच्या पुढाकाराने कोथरूड मतदारसंघातील आयोजित करण्यात आलेल्या महा-योजना शिबिराचे उद्घाटन मुख्यमंत्री देवेंद्र फडणवीस यांच्या हस्ते करण्यात आले. या वेळी ‘आमदार प्रा. मेधा कुलकर्णी यांनी पुणे शहरातील नागरिकांसाठी अतिशय उत्तम व आवश्यक असे महा-योजना शिबिर राबविले आहे,’ अशा शब्दांत मुख्यमंत्र्यांचे त्यांचे कौतुक केले.
केंद्र व राज्य सरकारने नागरिकांसाठी अन्नधान्य सुरक्षा योजना, मागासवर्गीय अनुदान योजना, अपंग कल्याणकारी योजना, संजय गांधी निराधार योजना, श्रावणबाळ योजना, महिला बालकल्याण योजना, युवक कल्याणकारी योजना, राजश्री शाहू महाराज शिष्यवृत्ती योजना, मुख्यमंत्री सहाय्यता निधी, आयुष्मान भारत योजना, प्रधानमंत्री आवास, जीवन सुरक्षा, जीवन ज्योती बिमा, मातृ वंदन योजना, उज्ज्वला योजना, माझी कन्या भाग्यश्री योजना यांसारख्या अनेक योजना आणल्या आहेत. या योजनांचे स्टॉल्स या शिबिरामध्ये लावण्यात आले आहेत. या वेळी नागरिक मोठ्या संख्येने उपस्थित होते. पुणे शहरात एक अतिशय स्तुत्य उपक्रम राबविल्याबद्दल फडणवीस यांनी आमदार कुलकर्णी यांचे अभिनंदन केले.
मुख्यमंत्र्यांनी योजनांच्या स्टॉल्सना भेट देऊन लाभार्थींची माहिती जाणून घेतली; तसेच अपंग कल्याणकारी योजना, संजय गांधी निराधार योजना, आयुष्यमान भारत योजना, अन्नधान्य सुरक्षा योजना आदी योजनांचे लाभार्थी व कोथरूड मतदारसंघातील वारकरी सांप्रदाय भजनी मंडळ यांचा फडणवीस यांच्या हस्ते सत्कार करण्यात आला. या शिबिरामध्ये तीन हजारपेक्षा जास्त लाभार्थींनी सहभाग घेतला. महिला बालकल्याण योजना, युवक कल्याणकारी योजना, मागासवर्गीय कल्याणकारी योजना, आधारकार्ड, अन्नधान्य सुरक्षा योजना यांसारख्या योजनांच्या लाभार्थींची संख्या लक्षणीय होती. या शिबिरादरम्यान ज्येष्ठ नागरिकांची मोफत आरोग्य तपासणी करण्यात आली.
शिबिराच्या उद्घाटनप्रसंगी पालकमंत्री गिरीश बापट, खासदार अनिल शिरोळे, राज्यमंत्री दिलीप कांबळे, महेश विद्यालयाचे लाहोटी, राष्ट्रीय स्वयंसेवक संघाचे पुणे महानगर कार्यवाह महेश करपे, कोथरूड मतदारसंघातील नगरसेवक-नगरसेविका, अध्यक्ष, पदाधिकारी व कार्यकर्ते आदी उपस्थित होते. २० फेब्रुवारीलाही हे शिबिर सकाळी १० ते सायंकाळी पाच या वेळेत सुरू राहील.